Күс айыра микән, аҡ болоттар
Муйылдарға килеп һарыған,
Тирә-яҡҡа һулап туялмаҫлыҡ
Кәрәҙле бал еҫе таралған.
Ҡолаҡ һалып ҡына торсо бер аҙ:
Еркәйемдә ниндәй тантана!
Яҙғы күктән дә бит ямғыр түгел,
Май ләйсәне булып моң тама.
Нәҡ себештәр инде бәпембәләр,
Ә себештәр - сәскә торғаны,
Түшәп кенә ҡуйҙы Яҙ-кәләшкәй
Яландарға ебәк юрғанын.
Көҙҙән ҡалған алтын келәм ҡайҙа?
Һеңеп кенә бара тупраҡҡа -
Һәр аяһы кескәй шәлкем итеп
Йәш үләнде сөйгән үр яҡҡа.